Acara Adat Batak

Acara Mambahen Tujung ni Namabalu.

   Hamu ito!, dipaporsanhon Tuhan ta do tu hamu nuaeng sada sitaonon na dok-dok. Huantusi hami do ito, tung mansai borat do sitaonon tu hamuna,...songon udan na so hasaongan, songon alogo naso hapudian.
   Alai ingot hamu ito,..ndada holan hamu namamorsan nadok-dok i, dohot do nang hami hula-hulamuna.  Ido umbahen na ro hami nuaeng mandapothon hamu tu son laho mambahen tujungmuna.
   Simbol manang tanda do itu tujuang on, paboahon tu hamu na adong do hami hula-hulamuna namangkaholongi hamu.
   Nuaeng ito, jalo hamuma tujung on. (Ditujungkon ma tu atas simanjujung nasida)...
   Jadi ale ito,...songon tujung i, naung ampe nuaeng di simanjujungmuna, songonima dohot holong ni rohanami, dohot tangiangnami mandongani hamu dohot angka berenami i sudena.
   Angkupni i, ingot hamu ito, hatani Tuhanta namandok: "Ahu do ama di angka namabalu dohot di angka dakdanak na somarama".
   Jadi, sada na mabalu...na olo manjalo jala mangkaporseai hatai, ndang pola be mabiar manang ganggu--di hangoluan siapari,--ai Tuhanta do silehon i sude.  On pe ito, sai hipas ma angka berenami i, songoni nang hamu sai hipas sahat tu na sarimatua pature-ture nasida....Botima.

Acara Mangungkap Tujung:

   Adat na doi diaturhon angka ompunta sijolo-jolo tubu: Dung binahen tujung ni boruniba, ingkon ungkapon mau muse, asa gok ulaon i.  Jadi nuaeng nungnga ro ahu ito mengungkap tujungmuna i. (Ungkap tujung jala dibalun).
   Ale ito,...songon naung hu ungkap nuaeng tujung i sian simanjunjungmuna, songonima sai mungkap jala harhar bahenonni Tuhanta sitaonon na dok-dok, jala na bernit na pinorsantonna i tu hamu.  Ai hatani Tuhanta i do namandok: "Ahu do na mamugangi, alai laos Aku do namangubati".
   Nungnga hulompit huhut hubalun tujung muna on ito,...Laos songonima di bahen Tuhanta, dilompit ma jalan dibalun sitaononmuna i, jala dipadao sian hamu.  Jadi mamungka sian saonari--ndang be tujung on di hamu ito.
   Ulos ganjang ma on di hamu, na umpitta ganjang ni umur di hamu, huhut namangulosi hamu dohot angka berenami. 
   Sai ulos si bahen na las ma on di hamu di panorop ni ngali ni ari, jala ulos sibahen na lambok di pamilngas ni ari.
   Ulos na marrambu do on, huhut na umpinta asa torop maribur songon rambu ni ulos on pomparan di hamu sian angka berenami on.  Sai horas ma hamu dohot angka berenami i, didongani asi ni rohani Tuhanta.  Songon umpasa ma dohononku :
1. Tinapu bulung siarum, bahen uramni pora-pora. Na hansit i tibu ma malum, jala tibu ma ro si las ni roha.
2. Eme si Tambatua, parlinggomanni si borok. Dilehon Tuhanta ma di hamu tua, jala sude hamu sai diparorot. Botima.

UCAPAN DUKA: Bahasa Batak.
   Hami pe antong dohot do mardok ni roha di parmondingni:......
   Hamu,...ro do hami paribanmuna, patuduhon holong ni rohanami di hamu. 
1. Tubu hau parira, di ladang ni Simangonding, Tung matua bulung pe natorasniba, sai lungun do roha molo monding.
2. Bagot na madungdung ma, tu pilo-pilo namarajar, Sai salpu ma angka na lungun, sai roma angka najagar.
   Sai tibu ma tarapul rohamuna dibahen Tuhanta i.  Pos ma rohanta di Tuhanta, sai na urupanna do hamu, ai ibana do nagabe Ama di angka dakdanak naso marama.
                                  ===============